學生哥參加比賽，唔係鬥體能就係鬥吓常識，比拼理財金融知識，仲要喺「公仔箱」度播出嚟，睇怕都係破天荒第一次。由花旗集團理財教育系列，聯同香港電台電視部，推出嘅「財智雙全」中學生理財通識終極鬥，噚日喺荷里活廣場舉行啟播禮，據知，一連六集初賽嘅首播日，已鐵定四月四日夜晚七點本港台播出，花旗香港行長陳子政，仲會亮相出任首集特別嘉賓。
至於總決賽壓軸嘉賓，就係財經事務及庫務局局長馬時亨，特區政府強調終身學習同埋通識教育，咁畀啲學生哥識多啲理財金融知識，唔單止唔會變成「洗腳唔抹腳」一族，仲係貫徹通識教育政策㖭。
六集已錄播嘅初賽，據講每集都有二十四隊（每隊兩人）學員參加，迄今參賽嘅學校共有五十三間，一百四十四隊同學，真係反應熱烈。問題內容呢，會環繞投資、信用卡、信貸、電子銀行、銀行體系及保險等課題，睇嚟各位學生哥要「咪」多啲財經新聞喇。
爆料熱線：29290000、27860099
報料傳真：26239278
報料電郵：[email protected]