剛過去個Week有乜重要得過世界盃，有多齣日、韓劇都喺今個星期大結局，先有每逢星期一晚十點喺日本TBS播的《夜王》，以做鴨為榮，有無窮的抱負，要帶給所有女人幸福，死爭爛爭為做歌舞伎町No.1，雖然內容造型娘到爆，但也成功令我笑足11集，究竟東京的女仔咩Taste，細心大晒咩，我組兩個編輯長毛、小彬彬落到場一定殺晒，改行啦，月入過10萬元！
到了星期三、四就忙於追喺MBC播嘅《宮》，呢套韓劇故事幾有噱頭，改編自漫畫，係講述如果𠵱家嘅韓國仲有皇帝的故事，但唔係傳統嘅帝國統治，模式就好似𠵱家嘅日本，主線係講王太子娶了一個三唔識七嘅平民女，係先帝指腹為婚嗰隻，王太子由起初抗拒到後尾勁冧，由Cool到深情，搞笑情節非常多，最重要Model出身嘅朱智勳（飾演阿信）真係好靚仔！
另外有個趣聞就係原來韓劇的製作同我哋趕稿落版速度好似，鋪鋪清，今個星期大結局，上星期先至趕去澳門拍，即食，我兩位好姊妹都有去趁趁熱鬧，仲攞埋親筆簽名，大叫：「信信真人仲索！」可惜當日我要去飲，冇得去追星！
