最近香港娛樂雜誌將會面對沉重壓力，政府將立例管制記者拍攝手法，狗仔無得偷影？咁以後娛樂雜誌搵乜嚟做封面？不過一向夠薑嘅本地傳媒應該好少理，銷書最緊要！數夠薑傳媒，日本潮流雜誌都不遑多讓。㗎仔一向予人感覺都好識得打扮，即使唔係好靚仔，出嚟效果都好有型，打開日本多本男潮雜誌，行Styling嘅男Model淨睇樣多數都唔多得，甚至乎有啲稱得上騎呢，佢哋都照影可也，照型可也，多數掹車邊都叫過到骨。
但最新5月號《COOL》真係唔鬧唔得，入面有幾版春天古着Styling真係大膽，雖然經典名牌古着衫款式老老土土就預咗，但睇晒全部Model嘅Image，不得不說一句夠勇氣但頂唔順，好彩回顧80年代大牌如YSL、ChristianDior、PierreCardin等嘅舊衫，慢慢回味卻另有一番樂趣。今期隨書還附送大嗱嗱5個STUSSY襟章，夏天用來扣CAP、扣布袋都啱用，喺日本買5個襟章都差唔多價錢，抵呀！
＠Gin
