學生C中學畢業之後，一直半工讀，不斷積累文憑證書，希望將來能夠成為專業人士。最近學生C在IVE讀工程，老師要求佢哋去理工大學聽演講，主題係蘇格拉底。學生C問肥仔K：「蘇格拉底係乜誰？」肥仔K向佢解釋一番，講埋柏拉圖與蘇格拉底嘅關係。學生C仍然滿腹疑惑：「我讀工程嘅噃，做乜要去聽關於蘇格拉底嘅演講？」
呢樣就難解釋咯，聽蘇格拉底係通識教育一部份，但好多學生唔明白點解要上通識教育課。左丁山就聽過一位大學教授發表講話時，在台上大聲疾呼：「中小學生平時多睇DiscoveryChannel、NationalGeographicChannel，就知道晒地球環境、環保嘅通識啦。入到大學重做乜鬼要嘥時間修讀通識教育？」好彩賓架P不在場，否則一定會反駁呢位大教授。賓架P經常話佢讀四年大學最有得益嘅課程就係上通識教育，讀過柏拉圖《共和國》、《共產黨宣言》、《中國文化要義》等等，至於佢嘅主修科，絕大部份都唔記得晒咯。通識教育之要害係學習思考方法與不同歷史文化，絕唔係學吓流行曲，旺角流行文化與綠色環保呢類皮毛。
何為通識，讀吓古書，原來可以應用於現實。呢日肥仔K到中環行街，上嚟左丁山辦公室上網直至下一個約會為止。左丁山無意中推跌一張櫈，一時發𤷪，肥仔K話：「《世說新語》有一個故事。晉末桓玄廢晉安帝篡位稱帝。桓玄嘅御床向下陷，桓玄大為不悅，好多在朝大臣以為此是不祥之兆。皇帝發嬲，好易人頭落地嘅喎，一位大臣恐怕勢色不妙，急忙上稟話：聖上厚德，厚地所以不能載也。咁識得擦鞋，令桓玄轉嗔為喜。你撞跌張櫈，冇畀張櫈責親隻腳，咪算自己行運囉！」肥仔K睇完本《世說新語》果然識講說話，各位得閒，不妨讀一讀《世說新語》，學番一兩招都好吖。