早幾日入投拄站買六合彩，忽然聽到首譜上新詞嘅男聲版《最佳位置》，「咦？乜歌詞嚟㗎，講波佬唱㗎？」可能因為歌詞搞笑得嚟帶點核突，一眾球迷馬迷六合彩迷個個駐足傾聽。返屋企Search馬會網頁，原來重有其他7首歌，8首歌全部圍繞世界盃A至H組形勢舊歌譜新詞，尤以《打得火熱》聽得最過癮，唔止我咁講㗎，連馮禮慈都話啲歌詞夠抵死幽默，做世界盃宣傳歌GoodFit。
記者：黃藹瑩
攝影：林栢鈞
模特兒：Katie、Wysam、Lion
宣傳歌講分組形勢
起初仲以為呢8首世界盃宣傳歌曲屬馬會自作業，問番先知原來只係買番嚟播，真正創作者另有其人，邊個？咪Keyman囉！估唔到Keyman講波叻，連搞宣傳一樣咁叻。8首歌由505Production一手包辦，Keyman主力做Marketing：「只要同體育有關，都一定有505Production呢個單位出現。」嘩，講得都幾Hardsell吓喎，「今次反應都幾唔錯，我哋有更大目標，就係希望卡拉OK都可以唱到呢幾首世界盃宣傳歌，打到八強，我哋會創作啲新歌。」而真正落手落腳嘅唱作人Marco就咁話：「馬會Set定故事大綱畀我哋創作，要圍繞8個分組賽作詞，所以搜集工夫比較多，講真我點會識晒32隊咁多個個球員？」佢自己都有份唱幾首，對外間批評唔太在意：「用心去試就算喇，當然我唔會就此滿足，希望可以創作多啲有意思嘅宣傳歌喇。」（ http://www.hkjc.com/chinese/index.asp）
快歌正過慢歌
D組首《打得火熱》絕對係8首歌之中嘅最佳金曲，不單止街坊波友話過癮，就連專業音樂人同導演都撐！樂評人馮敬慈話：「8首歌都走搞笑路線，以呢首發揮得最好，歌曲選用得啱，輕快又有節奏先啱做世界盃歌，歌詞都夠晒抵死，業餘創作嚟講算好唔錯。」導演李力持睇完段片就咁話：「呢類製作唔需要乜嘢剪接技巧，但一定要付出好大心機，咁多首歌之中我覺得《打得火熱》最似世界盃歌，快歌易記歌詞又夠搞笑，其他慢歌填詞填得太慘，唔啱Feel。」
馬會大搞宣傳
世界盃殺到埋身，馬會開始大搞宣傳，旺角信和中心側邊嘅投注站就搞咗個WorldCupZone，所有關於世界盃嘅資訊都搵得到，仲有Poster宣傳呢8首歌㖭！不過話時話，馬會不嬲都用開甘小文畫Poster，但硬係覺得𠵱家啲Poster唔多似小文畫風，問馬會，公關姐姐斬釘截鐵話：「係甘小文畫嘅。」唔信，致電問小文，小文話：「唔係我畫嘅。」咁即係點呀？不知名作畫人作品，我就覺得無小文畫嘅面相咁神似咁過癮嘞，上圖無估錯話，上排左起應該係羅賓遜、華素爾、泰利、李奧費迪南、謝拉特、林柏特，下排左二起應該係布歷治、朗尼同碧咸。
啜核歌晒冷
A組歌曲《最佳位置》
最精警歌詞：「其實實力不講也知 大熱晉級應該非難事 虛心踢要俾面轟炸機 咪跑個位置」支歌講主辦國德國隊今勻抽籤抽到最佳位置，話就話奇連士文教得唔好，不過要首名出線應該唔難啩？
A組 德國、哥斯達黎加、波蘭、厄瓜多爾
B組歌曲《左右為難》
最精警歌詞：「呢邊係佢老家 嗰邊係佢老闆個家 邊有做戲咁橋今次睇怕梗有牽掛」明寸英格蘭教練艾歷臣見利忘義，難怪嘅，畀着你，要錢定要良心先？
B組 英格蘭、巴拉圭、千里達、瑞典
C組歌曲《怎會如此》
最精警歌詞：「一切到此口擘大了捧阿根廷苦了甘了一切到此心也實了」阿根廷次次都抽到死亡之組，荷蘭難對付，仲有支黑馬塞黑阻住晒，球隊都想問怎會如此？
C組 阿根廷、科特迪瓦、塞黑、荷蘭
D組歌曲《打得火熱》
最精警歌詞：「以級數去計每個差一截 四方大亂 隨時輸波即撇 迪高會Chok過你」唱得幾有道理，墨西哥對葡萄牙已經大把好戲睇，呢首歌曲詞最夾最多人撐，正！
D組 墨西哥、伊朗、安哥拉、葡萄牙
E組歌曲《十面埋伏》
最精警歌詞：「呢鋪打餐死加捷美意大利組織緊釘統統有貨」其實4隊都算勢均力敵，點解一定要講到意大利遭受十面埋伏呢？
E組 意大利、加納、美國、捷克
F組歌曲《天下無雙》
最精警歌詞：「若問細哨誰來搶佢話稻仔壽仔也一樣 若問大哨誰來搶卡希爾加高華哪一雙會上」呢首歌歌詞改得最啱聽，大細哨一出邊個頂得順？巴西我支持你！
F組 巴西、黑羅地亞、澳洲、日本
G組歌曲《海闊天空》
最精警歌詞：「其實法國勇猛Win高級數無話愁怕最怕亞洲波鬥志好計對賽往績瑞士都可以再踢下去多哥不會伴我」法國晉級前景真係咁海闊天空？諗起上屆法國對塞內加爾輸一比零就……
G組 法國、瑞士、南韓、多哥
H組歌曲《也許不易》
最精警歌詞係：「開始恐懼當不了呢組最強球隊數最勁人士路爾斯加西亞不是呢班鬥牛士要晉級好睇個彩字」西班牙首名出線真係也許不易，你當突尼西亞流㗎？
H組 西班牙、烏克蘭、突尼西亞、沙特阿拉伯
