港股在3月份最後1日，似小型過山車，恒指高低相差225點，升過84點，跌過141點，埋單唔見75點。心血少啲、子彈唔多夠嘅炒輪客，輸錢多過贏錢。
唔計中移動（941）跌0.90元拖低恒指56點，其他32隻恒指成份股夾埋只係唔見19點。
中移動輪：中移動見新高，有啲位高勢危，就算唔勢危，短期都超買，咪搞C輪。咁，搞P輪又如何？都係咪搞，大家都唔知正股會否玩大挾倉遊戲，而且，得一兩個月壽命嘅P輪，溢價逾12%，5個月壽命嘅P輪，溢價接近20%，咁嘅數據買P輪，好易對荷包唔住。
如果真係手痕，又或賭性重，又或藝高人膽大，認為會睇中正股方向，係都要玩幾手，中移動C輪揀2256，P輪則揀4457。不過最好兩邊都唔賭，睇人表演好過。
澳元兌美元C輪9664：澳元兌美元近期散到好似斷線紙鳶（其他外幣亦係），昨日好番啲，澳元兌美元C輪9664「也文也武」，收1.7仙，大升55%，有11球易手，金額夠買1架日本車仔。睇澳元會反彈，9664係出擊對象。不過，澳美滙價𠵱家0.7156，到5月下旬時，升唔上0.755，則隻輪就係咁先，可以攞去打邊爐Sip邊爐底。
華能C輪9278：此輪做咗阿1，收5.5仙，升62%。7月中到期，行使價5.68元。正股（902）收5.30元，除息0.25元（人民幣）後，距離5.68元更遠。隻輪最後，冇得剩多過有得剩。賭呢隻輪，不如攞啲錢捐去蘋果基金。
章盛