豪宅市道近排轉旺，成交一窩蜂湧現，市場消息特別多，有啲同名人有關。例如噚日就傳出前政務司司長陳方安生阿媽方召麐嘅淺水灣南山別墅故居，以3100萬賣咗，單位面積2400呎，呎價近1.3萬。方老太二月份至過身，故居唔夠兩個月就易手，都算快速，可能大家都怕睹物思人。
呢個單位由陳太8兄弟姊妹共同持有，早於91年以550萬買入畀阿媽住，15年間升值4.6倍，勁賺2550萬，如果8個人平均分，每人都分到300幾萬。方家喺南山別墅仲有一個高層單位，由細妹方寧生喺02年以近2300萬買入。
另一單消息係近期大賣廣告嘅淺水灣道56號，市傳中建電訊主席麥紹棠，斥資近1.5億再買多3間複式；麥紹棠之前已經用咗3.8億買入4個複式，加埋呢3間，總共持有7間，總值5.3億，成為大業主。
淺水灣道56號𠵱家只賣剩兩間示範屋，入場費至少半億，唔少買家都係城中知名富豪，包括賭王三太陳婉珍、英皇集團大股東楊受成、恒生銀行創辦人何善衡家族後人、柏寧酒店陳澤富家族等。
電郵地址：[email protected]
