領匯早前大手租咗15個舖位畀上市公司U-Right，啲商場又大搞宣傳活動催谷人流。𠵱家輪到停車場出新招，繼之前嘅購物免費泊車優惠外，𠵱家仲喺5個停車場提供日泊優惠，只要畀50至68蚊，可以泊足一日，比時租平五成至七成七。其中日租68蚊最貴嘅赤柱廣場停車場，比時租平53%；而黃大仙中心停車場，日租60蚊，比時租慳77%。其他龍翔中心、彩雲商場同樂富中心停車場都有類似安排，就係要吸引大家多啲去，行耐啲。
另外，領匯一共有98個商場提供消費泊車優惠，消費滿指定金額就可以免費泊車。為咗加強競爭，由5月1號起，佢哋幾個新界停車場私家車月租收費略為調低，減收100至375蚊。