行街買嘢的時候經常會有類似情況發生，尤其是在大型的服裝連鎖店：自己手執一件實在無法接受，即使你畀五百蚊我着畀你睇都要考慮的枱布衫，問身邊朋友：「呢件衫咁核突，點解啲Buyer會入貨？邊會有人買呀！」通常話口未完就會有位姐姐走過來，以好似執到寶的語氣說：「嘩！呢件衫好得，一定要買至得！」正所謂你當係草時別人當係寶。前兩日行街，知道Dior返了最新的Accessories，當然要落舖巡視一下，我睇中咗一條掛着大紅膠蜜蜂吊墜的電鍍銀鏈，雖然不是純銀也要賣千三，價錢唔叫好合理，不過就勝在個紅色膠蜜蜂吊墜夠出，「Dior」個牌的Size又夠恰到好處；相反旁邊另一種新款「茶杯系列」就唔多掂，心諗邊會有人戴啲又長又墜的杯杯碟碟上頸上耳，價錢一樣千幾銀，正研究究竟有無人會買的時候，同樣情況又發生，一個女生同佢男友（又可能係觀音兵的物體）嗲住講：「啲茶杯Accessories好Cute呀，買唔買好呀？」
