是日話題：鬼片笑死人！
清明節上山掃墓阿媽不停嘮叨，百幾樣禁忌，煩到不得了。講真，阿媽迷信都是為你好，怕你胡言亂語闖出禍，擔心你個鬼片迷，追看鬼片追到上腦。不過各位Mother又大可以放心，小記街訪一眾年輕男女都話點會將電影的內容當真，大部份都係得啖笑，直情當笑片咁睇。當中佼佼者有「鬼王」雷宇揚的一系列陰陽路電影，就連勁Sell恐怖的《見鬼10》都成為最多人投票的「笑得出」鬼片。
記者：黃藹瑩
攝影：陳智良
《見鬼10》劇情簡介
得仔（陳柏霖）與May（楊淇）兩表姊弟、April（梁洛施）和高輝（古宇）一對情侶，在泰國朋友長貴的帶領下隨意玩一個見鬼的遊戲，跟其他的參與者一樣都從來沒有預先睇清楚遊戲的警告……
《見鬼10》最搞笑？
全民投票之後，《見鬼10》的「搞笑」程度贏足成條街，小記跟自己的同事討論賽果，佢哋都話呢個賽果好合理，是實至名歸，同事阿I仲話當時睇完後直頭想割椅，全戲唯一可取兼有印象的就是楊淇濕身大暴走，其他的全是嚇細路的劇情，看過《見鬼10》的你又有冇同感呢？
《見鬼10》十個笑話！
（左）S先生
「題材幾有趣，10種見鬼的方法，不過最後變成咗10個笑話，我同身邊的嗰個朋友不停鬧：『唔係嘛……白癡㗎！』，演員唔好都可能係一個問題。」
（右）J先生
「我初頭以為會好驚，但最後離場時想同我個friend搗亂，因為驚就冇，笑就大把。」
得啖笑鬼片逐套數
1.《搞乜鬼奪命雜作2》
雖然拍到第3集，不過始終都係第一集最收得最多人睇過，淨係玩呢個Matrix動作都笑爆嘴。
Carol：「我好少睇鬼片，只看過呢套搞笑鬼片，雖然佢擺明搞笑，但都有啲驚位。」
2.《奇幻潮》
擺明重抄當年《幻海奇程》的《奇幻潮》，雖然有伊麵做主持，但佢「懶」神秘同恐怖的聲線反而係最大的笑位。
Annie：「我唔記得有咩鬼片，反而係搞笑，不過就覺得無綫播的《奇幻潮》好低能，驚唔出，笑位絕對十足。」
3.《死神又來了3》
又係嗰句，未入場就已經估到晒啲劇情，總之到最後全部人死晒就得！
MsChoi：「最唔鍾意啲鬼片驚嚇片俾人估得中劇情，之前嘅《陰陽路》系列就係咁，不過我冇一集仲記得，反而最近睇嘅《死神3》真係冇料到，我估到之餘仲笑得出。」
4.《回魂夜》
唔好講街坊，小記自己最愛的星爺片都係《回魂夜》，不過套戲冇出過DVD，VCD出過又賣斷冇再出，知道邊度有得賣唔該通知聲。
Peter：「周星馳唯一一套鬼片，雖然知佢係sell搞笑，但有些片段都搞到我有點寒，唔止搞笑咁簡單。」
5.《陰陽路》系列
想買VCD重溫咁多套都有難度，當日小記搵咗成個老銅都只係得呢隻《凶周刊》，盛惠$15。
DVD及VCD售賣點
widesight
地址：銅鑼灣駱克道517號地下舖