一年一度嘅滙豐青年企業家獎噚日揭曉，由香港大學工商管理（法律）學系學生劉韻詩、聶文樂二人組合力壓群雄奪魁，唔單止有三萬大元獎金，仲可以去美國加州柏克萊大學校外進修部搞嘅遊學團。得獎作品係一個數碼照片管理系統，評判之一嘅和黃副主席李澤鉅聽完個計劃書，都大讚個proposal有得諗，至於和黃嘅3G會唔會考慮投資，Victor就話未到咁嘅階段。
台上嘅大學生鬥得燦爛，點知台下嘅評判都鬥埋一份。評判團喺賽後會見記者，李澤鉅話香港作為國際大城市，年輕人唔憂冇創業機會。瑞安集團主席羅康瑞就當面反對，佢話香港市場太過成熟，年輕人想喺香港創業好難，除非返內地；Victor隨即回應：「咁你冇唔同意喎！」滙豐主席鄭海泉就為香港嘅大學生抱打不平，佢話今次賽事證明香港大學生水準高，年輕人唔好妄自菲薄，社會輿論亦唔好一面倒批評啲大學生一無是處，搞到啲僱主都唔敢請本地生。羅康瑞撩完Victor之後，又撩鄭大班，大班話年輕人最緊要對自己有信心，羅康瑞就即刻慨歎創業好苦，當初滙豐都唔肯借錢畀佢創業。
傳真︰2623-9278
電郵︰[email protected]