心水清者都知，全球最細行1080i的SONYHC3（$10,980），將於4月中推出；舊款同為HDV的HC1又點可以唔落價呢？現時HC1的行價仍企硬$13,880，不過，據知嚟緊4月頭，HC1會搶先發難，下試$9,000餘新低位，如果成為事實，佢將會係市場上最平賣HDV。
老實講！SONY旗下稍靚質地的「普通DV機」，都賣緊7-8千幾！但唔好忘記HC1可強錄1,440×1,080高解像影片（亦可拍普通DV格式）、4聲道靚聲收音，更正是使用了HD級的蔡司10倍光學變焦T*鏡頭，真係用佢嚟拍普通DV片，啲色都包你話比好多所謂頂級機「標」好多啦！而且嚟緊電腦用Blu-ray燒碟機將在今年內推出，玩HD！正是時候呢！
記者：朱崇德