麥浚龍嘅小師妹吳日言（阿Yan）同女子組合Krusty嘅工作量一向都唔多，馮仁昭嘅廣告公司朋友話次次搵親佢哋公司啲藝人做嘢，佢哋好興要同對方「𦧲」多五千蚊，搭埋阿Yan同Krusty呢兩份「豬頭骨」，為咗搵兩餐，作為新人嘅阿Yan同Krusty都好肯做，唔介意掹人衫尾。
稱做法正常
就有關傳聞求證阿Yan同Krusty嘅經理人公司，發言人Gary噚日就喺電話度話：「呢啲問題經常有，亦都好正常，當有廣告公司搵我哋旗下公司嘅藝人，我哋會同佢講，仲有其他新人，如果對方budget可以嘅話，都會叫佢哋預埋公司新人，當係一個套餐咁啫！好似請衞蘭，好多時都搭埋佢師弟應昌佑啦！」
咁搭埋阿Yan同Krusty個價係咪大概五千蚊？Gary否認話：「一定唔止呢個價，如果一齊搵同公司藝人，我哋或者會打個折扣畀廣告商，平一、二千蚊，但如果係慈善活動，佢哋就唔收錢都得。」
