鳳凰衛視噚日喺機場亞洲國際博覽館慶祝成立十周年，今次個活動叫做「鳳凰因你而美麗」，果然星光熠熠，老董同煲呔兩個都係主禮嘉賓，佢兩個仲一齊行入會場，有講有笑。有行家問老董支唔支持煲呔連任，老董就唔肯答，反而煲呔就笑口噬噬，好似充滿信心咁。
鳳凰就頒咗個「十年成就鳳凰大獎」畀「為香港嘅繁榮穩定付出辛勞」嘅前特首老董，連戰亦「因促進兩岸和平有功」而獲大獎，不過佢冇嚟，由老婆方瑀代領。老董做到被北京叫收皮，而連戰次次都選唔到總統，佢兩個呢次都算係攞番個安慰獎囉。
噚晚仲有位台灣出家人比較少見，就係當年幫許家屯出走美國嘅政治和尚星雲法師，佢好似好耐冇喺香港露面，而且仲同中聯辦嘅高祀仁同外交部嘅呂新華同場出現，劉長樂主席真係有本事。
傳真︰2623-9278
電郵︰[email protected]