開講都話人愈老就愈化，但八方相信，呢句話絕對唔適用於賭王同佢細妹十姑娘身上，相反，佢兩兄妹之間嘅恩恩怨怨，似乎愈來愈激，愈來愈怪！
好似噚日，賭王就快上市骨水檔澳娛響馬交開股東會，一如所料唔畀代表十姑娘嘅滿威利基金入去，咁十姑娘方面亦唔怠慢，入唔到去即刻隔個大海響香港做嘢，叫人call行記者話出嚟講澳娛上市，同大家分享佢對澳娛好多嘅「不明白」，而最過癮係仲要響小賭王開新濠業績記者會嘅港麗酒店見大家，勁有踩場feel，於是各大傳媒即時抽調人手……結果，上到總統套房，十姑娘影都冇，大家於是同個公關拗咗好耐，搞咗一粒鐘，佢先肯帶大家落樓下見滿威利幾個委員影番張相交差……真係人都癲！
嗰幾位代表除咗話唔講嘢，都算交足戲舉晒紙牌咁，代表之一張宇人話好快就會有下一步行動，而個公關仲正，響定畀大家知十姑娘四月會喺北京蒲頭見大家……仲有下次？仲要去到北京？八方聽到都驚，十姑娘如果真係有乜嘢想搵人呻，做吓好心正正經經call記者啦！
傳真︰2623-9278
電郵︰[email protected]