3月最後1個交易日，恒指先升後跌，日線圖出現1支穿頭破腳的陰燭，唔通秋官效應真係咁勁？
有幾個股友更加身體力行，買定恒指P輪迎秋官，結果谷到一肚氣，猛鬧發行商輸打贏要。
其實上個禮拜有個讀者亦投訴過呢類問題，嗰隻輪係趙飛雲曾推介嘅2264，佢話打電話向發行商查詢隻輪點解唔跟指數走，答案居然係點解唔買佢哋推介嘅4476，嗰隻輪佢哋做得好好多。
散戶玩輪一肚氣
趙飛雲以往喺呢個欄提過好多次，玩輪要揀啲售後服務佳嘅發行商，佢哋提供貼近市場及相對較穩定的引伸波幅，咁樣才有機會贏錢。特別是在未有明顯方向的上落市中，窩輪發行商是否有方向性睇市出價，或機械式跟隨指數的升跌自動調整輪價，往往比隻輪嘅數據更重要。
其實今個星期2264的引伸波幅已回升頗多，唔算做得好差，或者這代表發行商方向性睇淡大市。
昨日早市在1.23元買入20萬股創維數碼（751），最後以近全日高位1.27元收市，升4.1%，表現相當不俗。
創維昨升穿保歷加通道，有機會打破近期的橫行走勢，短炒首目標暫定1.50元。
今個星期趙飛雲其實走雞頻頻，麗展（488）同麗豐（1125）果然跌近20日線即見底回升，呢幾日仲要升到唔識停。不過另一隻玉皇朝（970）則向下試底，昨日低見0.56元後彈回0.59元收市。
玉皇朝觀望試底
玉皇朝日線圖昨出現錘頭，是否調整已完暫時好難講，照計隻股故事未完，再跌幅度應該有限，宜睇實隻股，一旦確認見底，便乘勢買入。
趙飛雲