老細開這個欄時給了我兩大難題：一是要出賣自己嘜頭；二是抽中籤期期寫音樂，其實不嬲同情樂評人，餐餐食雞肋還要找出樂趣來。我羨慕「滔滔」天生異稟，次次七情上面，個個星期流晒口水咁話：「正呀！第二度食唔到！」我相信他是真心的。
今日偷下雞寫「講價」。
因為要飛日內瓦採訪錶展，兩三星期前決定買部Notebook，在飛機上趕稿！從事IT的弟弟叮囑勿買4個英文字母日本某名牌，「過了保養期實壞。其他牌子就幾乎一樣。有銀両，首選是F記、T記和D記，前兩者貴，後者勝在平。」最後鎖定目標是這部NEC，因為做緊特價，仲送夠1GbRAM。購買時先到大型連鎖店B記，開價$9,990，畀Cash$9,490，嘩，平5嚿！問完去隔籬F記問問，點知佢話$9,490仲可以用卡分期，再送你兩件禮物！阿媽教落買嘢要貨比三家，由於得兩家，於是我又返B記。
「我問一問經理。」靚仔Sales哥哥話。咁答我當然是Yes啦，咁有乜禮物先？「無線Mouse、128MB手指、Webcam、OpenOffice、耳筒……滿意嗎？」定力不足，我𦧲飯應話「滿意」。識講價，仲以為自己好醒，事後周圍同朋友講。
一星期後再經過，部機賣$8,990！