猿人節：強攻炒貨　水貨猿人：「未驚過」

今日猿人重臨香江，整個3月，全港傳媒、猿人Fans都為咗一個馬騮頭而東奔西跑，另一邊廂香港水貨店早就有備而戰，有人減價促銷、有人驚都未驚過、亦有人視總店為合作夥伴。做生意都係為咗「求財」，面對行貨壓境，今日有請各水貨佬攞出鎮店之寶「晒冷」，睇吓佢哋有乜計！

記者：羅灝汶　攝影：陳偉強

■與DAY的粉紅色鑽石BapeZip-up同一系列，不過阿Paul話藍色最罕有，而且Size愈大愈貴，呢件就賣$9,000

■猿人新出的Tee，日本方面已經斷貨，罕有！$1,880

■咪睇小呢一對紅色大腦IconBapeSta$9,999，好難先可以入手。

買取店DAY：「罕貨為主各有各做！」

Jenny：「行貨對舖頭唔會有影響。我哋舖頭售賣水貨之外，亦引入咗日本買取店形式運作，客人有合適貨品寄賣我哋都會幫手，近期唔多見客人放多咗Bape嘅產品，貨源亦冇乜大起跌，我哋舖頭依然着重『罕貨』為主，當中鎮店紅色Zip-up賣$7,800，肯定行貨絕對唔會有。而精品或者炒價貨市場依然良好，所以唔會特別減價促銷，入新貨亦唔會手軟，實行各有各做。」

■上季的猿人Patchwork長袖恤衫，不規則印有BapeCamo圖案$1,680

DAY
地址：銅鑼灣總統商場地面28B舖
電話：28387891

■紅色BapeZip-up$7,800，屬最搶手系列，因為是上季炒貨，行貨亦都唔會有得賣。

NothingMuch：「最怕做臭個朵！」

「我哋主打炒貨、罕貨，靠賣Tee一定賺唔到錢。呢期的確入少咗貨，因為想睇清楚行貨走勢，如果行貨貨量少，啲客人依然會返嚟搵正嘢。我自己亦開始對猿人產品抱有觀望態度，有啲着開猿人嘅朋友近期都開始減少自己收藏。始終都驚散唔切貨，Tee我已經開始減價，之前賣$680，𠵱家$550左右有交易，Bape精品以後亦盡量少入喇。
「行貨嚟，最怕係做臭個品牌，猿人可以企硬咁多年，全因量少。反而我睇好Nigo同Pharell合作搞嘅IceCream同bbc！」

NothingMuch
地址：銅鑼灣景隆街5號地下3B舖
電話：21170007

■IceCream衞衣$1,980，Pharell同Nigo合作的品牌，阿Paul睇好佢升值潛力。

■之前Edison都有着過，當炒雙面風褸$4,800，行貨一定唔會翻出咁話。

水貨猿祖宗Anytime：「客路有別」

Dary：「有行貨絕對係好事，因為Nigo最關心就係老翻猿人同老鼠貨問題，始終Bape喺大陸設廠，無可避免有不法分子偷走啲次貨或者樣辦出來香港賣。香港有行貨店，打擊最大一定係老翻老鼠貨而唔係水貨舖，如果你哋見到一對$999嘅猿人鞋，一定有問題！我哋舖頭依然會入Bape，始終客路有別，而且日本當地都可以容納到水貨舖頭，香港冇可能唔得，我哋會主打Bape新貨同炒貨。」

Anytime
地址：尖沙嘴利時商場地下9舖
電話：23117068