香港BapeStore開檔，ABathingApe必屬炒品，唔少水貨佬都要遠征東洋撲番一兩件鎮店壓場，搞到成壇嘢好似好巴閉咁。問我點睇？又多個唔使諗嘅題目見報咁睇囉，有幾巴閉啫？夠老翻貨巴閉，踩落花園街、女人街同老廟，N咁多件老翻Ape望落一樣有型有款，襯埋玩Styling講真一啲都唔輸蝕！鍾意嘅話，襯行成身老翻直踩BapeStore，當贈佢興都夠盞鬼喇。
記者：楊成
攝影：陳陶鈞
模特兒：Kristy（Salvador）、Andrew
老翻重災區
女人街
女人街一向係假貨集中營，日潮名牌Ape梗有份，假貨檔口唔及花園街多，只有一兩檔賣Tee及小朋友衫，而且質素亦屬一般，一睇就知流料嗰隻。
廟街
無錯香港有遊客嘅地方就有名牌老翻，不過Ape可能唔係幾啱老廟客胃口，冒牌貨唔多，有啲仲完全唔似，純粹抄個Print印件普通Tee，純粹湊吓熱鬧。
花園街
一眾師奶媽咪最鍾意行花園街掃平貨，兜個圈，發覺大約有4間舖頭賣老翻Ape，其中一間賣嘅假貨質素好高，Tee、外套、Sweater、鞋同袋一應俱全，好明目張膽。
真假貨大比拼
買大堆老翻貨嚟個真假大比拼，發覺唔少假貨都抄得幾似吓，無撐開Ape嘅人同遊客分分鐘會俾不法商人魚目混珠，實在離譜。
1抄得最足！
無論顏色同設計都抄十足十，不過假貨顏色較沉、迷彩圖案錯誤，睇真啲假貨隻字粗啲㗎。
相似度90%
2冒牌玩X！
驟眼睇難分真頭假頭，一比原形畢露，真Ape頭較有神氣，假貨招牌索性用「MikiMini」，估唔到冒牌都玩Crossover─ABathingMouse？
相似度70%
3最有創意！
MILOTee一向甚受港人愛戴，假貨大玩創意，手多多釘假水晶加頂帽畀佢，勁搞笑。
相似度50%
4曉玩閃！
未見過呢個款嘅長袖衞衣，不過假貨卻醒目地迎合大眾口味玩「閃」，同Theme跟正貨玩閃石，掂呀。
相似度20%
5圖案最似！
迷彩圖案算幾可亂真，拉鏈外套設計上都幾大出入，算抄得幾有誠意吓，唔熟Ape嘅應該會幾易中招。
相似度65%
6幾可亂真！
如果唔記得圖案嘅話，真係唔摸上手、Check過件衫嘅質料亦難辨真假，唯一美中不足係字款有較明顯破綻。
相似度60%
7創意之作！
又一創意之作，Ape頭抄就唔該抄得似啲喇，假貨額頭太平，個嘴又整到陰陰笑咁，都唔知佢想點。
相似度30%
8無猿人頭！
睇正面同側面可謂完全一樣，唯一破綻喺鞋尾，真貨會有Ape公仔頭，BapeStaLogo手工亦較靚。
相似度90%
9無交叉眼！
雖然童裝無刻意冒充，但竟然有童裝褲個ApexKaws公仔車袋跟新版一樣，只係無咗交叉眼仔。
相似度70%
10無誠意！
老翻Ape飾物一向唔多，證明市場需求唔多，所以睇得出冒都冒得無乜心機，離晒罩無誠意嗰隻。
相似度30%
教你辨真偽
雖然香港假Ape貨唔算冒得太出色，不過一向流傳日本有好多幾可亂真嘅A貨，為怕奸商將A貨當正貨賣魚目混珠，一於叫水貨佬教兩招辨真假。
1.洗水Label有兩個
假貨中以迷彩Bape衞衣冒得最似，不過要分都唔難，正版會有2個洗水Carelabel。
2.Ape招牌手工細緻
雖則好多假貨都會車埋Ape招牌上衫領，但睇真就會發覺假招牌車線鬆散，質素好差。
3.袖口牌仔有幾條毛
好多真貨Tee袖口都車猿人牌仔，真貨牌仔底部會有幾條線，好多時假貨猿頭會左右掉轉。
街訪
小儀：「唔特別鍾意Bape，跟過朋友去觀塘入貨，老闆話係真嘅，買咗3嚿幾水，都唔識分真定假。」
