黎明與楊千嬅前晚在紅館演出雷頌德的慈善音樂會，一個熱戀、一個單身，黎明唱《好心分手》時玄妙談緣份，千嬅唱《男士今天你很好》時則盡顯渴望有男友的心境，她說：「以我經驗嚟講，爆軚同停電時都最需要男人。」
雷頌德（Mark）前晚帶領一眾歌星於紅館演出「雷頌德公益金音樂會」，獻唱他的作品，表演歌手包括譚詠麟、黎明（Leon）、古巨基、陳慧琳（Kelly）、楊千嬅、盧巧音、何韻詩及林憶蓮等。
齊人變儍仔
黎明事前在活動上抽到獻唱《好心分手》，不過現正與名模樂基兒處於熱戀期的他，演唱前突然對感情似有領會說：「屬於你就係屬於你，唔屬於你就係唔屬於你嘅，有時緣份嚟到你手，都未必屬於你。」雖然觀眾聽得一頭霧水，但不少黎明歌迷都歡呼大叫以示支持。
與鄭中基甩拖後一直單身的千嬅，近年不時坦言想拍拖，她前晚演繹鄭秀文的《男士今天你很好》時說：「女人就算幾獨立，某程度上男人都好重要，以我經驗嚟講，爆軚同停電時都最需要男人。」千嬅獻唱時突然耳機失靈，她說：「聾耳機失靈，有冇人幫我？」一位男工作人員衝上台為她整理，千嬅即說：「哎，勇士呀，男人呀，你哋𠵱家明點解啦！」
而千嬅與Kelly、黎明合唱時，兩女挽着黎明的手，讓他享齊人之福，不過Kelly與千嬅一個拖手，一個挽手，讓黎明有點混亂不知所措，事後Kelly說：「我同千嬅有綵排，Leon冇嚟排，Mark又叫我哋要黐埋啲。」雷頌德則說：「諗住佢同兩個女仔唱，好似大情聖咁，估唔到佢俾兩個女仔夾住變咗儍仔，好可愛，兩個女仔好熱情，整鬼佢。」談到黎明唱《好心分手》，雷頌德說：「呢排佢心情唱唔到呢種味道，佢練咗好耐，唱人哋啲歌好難㗎。」問到黎明有否要求轉歌，雷頌德說：「冇，佢鍾意首歌亦唔介意唱。」
憶蓮送驚喜
前晚最受歡迎的是神秘嘉賓林憶蓮，反之盧巧音獻唱《深藍》則是觀眾廁所位。日前有傳憶蓮懷有男友陳輝虹骨肉，她前晚穿着白色泡泡裙，看來腰肢較粗，她唱罷《為何她會離開你》便匆匆離開，沒有接受訪問。
事後雷頌德說：「我哋出咗海報先知佢可以嚟到，本來佢話呢個時候喺美國，後來佢又嚟到，又唔介意海報冇佢名。」至於有傳憶蓮有喜，雷頌德說：「我唔覺佢係，我覺得佢fit咗。」
而當雷頌德與Kelly及千嬅合唱時，Kelly因穿着拖地長裙有點行動不便，他即和千嬅為她拉裙尾，突然千嬅拍打雷頌德的手說：「唔好整咁高，會走光㗎。」Kelly與基仔拖手合唱，基仔忽然改為輕攬Kelly纖腰，Kelly說：「領教到你嘅濕手功，未試過拖隻手咁濕，好滑稽呀。」
採訪：李珮洳、駱華齡
攝影：葉君海
