Forever叮噹精品擺滿屋、半張床讓咗畀多啦A夢、趕絕晒所有女朋友……無計,結果要求救玩具店老闆電車東。電車東:「太多貨嘞,我闢個地方畀你,一來可以放貨,二來可以當展覽。」就係咁,租箱服務玩具店變成迷你多啦A夢展覽館,入箱精品十件有八件都唔賣。個個月明蝕$4,000租箱費都制?制!慘得過人哋蝕得起呀。
記者:陸伊琳 攝影:陳陶鈞 模特兒:Ken、Fa(Salvador)
遊MK慘遭博懵
30出頭的Forever,97年用$8,000從日本訂咗呢隻一比一4呎幾高多啦A夢公仔回港,呢隻公仔全港唔多過10隻:「97年好景,嗰時買一啲唔覺貴,曾經有人喺網上放$16,000,問我賣唔賣?唔好儍啦,唔賣。」見公仔真身,我當堂打個突,乜卡通片裏面嘅多啦A夢有咁大隻嘅咩?兩隻手都攬唔晒!帶公仔落旺角影相,引來全場羨慕目光,更有路人甲乙丙趁機偷偷摸吓佢索油!問咁多年用咗幾多錢儲精品,Forever話:「深奧問題,都唔清楚,大約20幾萬,𠵱家套現分分鐘賣到50萬,買層唐樓都得。」貴精不貴多,我影10件精品,佢話:「淨係得2件我肯賣咋喎。」我氣結,佢神經刀:「唔係因為罕有又或者係絕版所以唔賣,因為我只得1件。」相反某啲80年代絕到唔絕嘅絕版貨,佢肯賣:「因為我有2件,賣咗仲有1件。」的確佢唔志在做生意,每月明蝕$4,000租箱費畀阿東。
街坊愛公仔
驚你掃興有得賣
打死唔賣展覽品!
ExchangeSquare
地址:旺角信和中心1205室
租箱費:每月$300,箱體積長闊高各1.5呎
電話:23887270