早前香港國際電影節舉辦了一個票房祝捷大會，宣布突破以往二十九年的票房，網上預售門票喺幾個鐘內全數售出，其中兩套開幕電影《黑社會以和為貴》及《伊莎貝拉》更於兩小時內所有門票沽清，不過另一套於頒獎禮之夜播的主打電影《暗湧》未能達到一出即爆的預期反應，實令不少人跌眼鏡，係觀眾唔識貨吖，定宣傳不足？就等我搜羅一些滄海遺珠的戲，讓大家最後衝刺去撲飛，絕對唔係賣剩蔗！
記者：羅灝汶
攝影：陳偉強、羅灝汶
*以上為設計對白
購票及查詢www.hkiff.org.hk
靚仔吳彥祖力撐《暗湧》
最令人跌眼鏡的一套戲一定係屬於頒獎禮之夜播的《暗湧》，開售十日都未完全爆滿。就連吳彥祖都忍唔住要出聲聲援一下：「我會推介《暗湧》，佢係今屆柏林電影節競賽組入圍電影之一。前年《LastLifeintheUniverse》已經見到泰國導演Pen-EkRatanaruang的功力，而《暗湧》就由原班人馬，仲有淺野忠信做主角、杜可風攝影，再加埋《原罪犯》女主角姜蕙姃，陣容非常吸引，加上畫面好有Style、故事亦好creative，絕對係心水之一，不過可能題材方面唔太啱香港人口味所以仲未去晒飛，呢一套非常值得大家去欣賞吓。」
《暗湧》講乜？
內容都好貼身，是似曾相識的澳門孽緣，但絕對沒有《伊莎貝拉》的影子，主角淺野忠信為了忘記往事，取道香港往受災後的布吉，重建城市亦重建自己，認識上一位漂亮的姑娘，但一切好像再似重演……套戲富有色情、暴力等等商業元素，再加上不少藝術元素，絕對合晒觀眾口味。
門票去貨量：去93%
暗湧
導演：彭力
日期：13/4（四）
時間：7:00pm
地點：香港文化中心大劇院
日期：16/4（日）
時間：9:30pm
地點：UA朗豪坊
《立見天國》歌頌人肉彈?編劇、學者都叫好
憑着《無間道》贏得金像獎最佳編劇的莊文強，極力推介《立見天國》：「單睇個故事大綱，已經覺得非常吸引，內容講述一班殺手點樣誕生，好有張力，又有暴力元素，絕對夠晒話題同娛樂性，唔睇唔得。另外套片亦入圍了奧斯卡，可以話係信心之選，相比《慕尼黑》真實好多，不過唔知點解成績比預期差囉。」
資深電影學者吳昊：「我都極力推介《立見天國》，故事由巴勒斯坦人拍，夠晒原汁原味，相信由佢哋把口講番點解要策劃恐怖襲擊就最好不過，而且描寫出恐怖分子都係有生活、有家人，個個人都係有血有肉，值得一睇。《立見天國》個故事非常簡單，只不過拍出一個普通人嘅日常生活，最大分別係佢要面對死亡，《立見天國》唔會有太多政治思考，絕對唔偏門。」
《立見天國》講乜？
曾經引起過很大的爭議，甚至有3.6萬人聯名去信奧斯卡抗議，反對的人覺得《立見天國》美化了自殺式炸彈襲擊者，故事是講述兩位年輕的巴勒斯坦男子，有天一個不知名的巴勒斯坦組織找來他們充當自殺式炸彈，原來這是兩人自幼的心願。懷着忐忑的心情，兩人被帶到特拉維夫並裝上炸彈……
門票去貨量：80%
《立見天國》
導演：阿布阿薩德
內容：講述兩名巴勒斯坦的死士，人生旅程中的最後27小時
日期：15/4（六）
時間：6:00pm
地點：香港文化中心大劇院
日期：17/4（一）
時間：4:00pm
地點：UA太古城
撲飛最後召集
官方表示以電影質素，都應該係開票房無耐就應該會爆滿，不過已經開售10日都未完全爆滿，絕對係跌晒眼鏡，以下是一些滄海遺珠的戲，撲飛趁早！
1.《死者之書》
導演：川本喜八郎
門票去貨量：70%
內容：公主、王子的愛情故事。
日期：8/4(六)
時間：12:45pm
地點：香港文化中心KG
日期：14/4(五)
時間：9:00pm
地點：葵青劇院TY
2.《熊人》
導演：華納荷索
門票去貨量：68%
內容：灰熊癡努力保護大灰熊的感人情節。
日期：9/4(日)
時間：9:00pm
地點：香港大會堂CT
日期：17/4(一)
時間：6:00pm
地點：葵青劇院TY
3.《板仔玩轉L.A.》
導演：萊利格勒
門票去貨量：60%
內容：不再典型的板仔Look，窄腳褲、PunkRock板仔非常有趣。
日期：9/4(日)
時間：9:00pm
地點：葵青劇院TY
4.《小心眼》
導演：黎妙雪
門票去貨量：72%
內容：血腥暴力的展示，每個角色都有其古怪荒誕的一面，從驚恐中探視人性。
日期：8/4(六)
時間：3:00pm
地點：香港大會堂劇院
日期：14/4(五)
時間：11:30pm
地點：UA朗豪坊
5.《打雜詩人》
導演：賓特哈馬
門票去貨量：56%
內容：主角亨利嫖賭飲吹無所不為，長工未做過，因為做個爛佬，床上工夫會更好。
日期：11/4(二)
時間：7:15pm
地點：香港文化中心KG
日期：15/4(六)
時間：12:30pm
地點：UA太古城中心UC
6.《走火溫黛》
導演：湯瑪斯雲提堡
門票去貨量：54%
內容：隱蔽少年愛上了真槍，人槍從此形影不分，他暱稱槍為「溫黛」。前提是戀物，反美意識卻若隱若現。
日期：15/4(六)
時間：4:00pm
地點：UA太古城中心UC
日期：18/4(二)
時間：7:15pm
地點：香港文化中心KG
7.《日之丸》
導演：亞歷山大蘇古諾夫
門票去貨量：71%
內容：導演亞歷山大．蘇古諾夫「獨裁者系列」的第三部，講述日皇裕仁宣布日本投降前後的日子。
日期：11/4(二)
時間：9:30pm
地點：香港文化中心大劇院
*門票去貨量統計截至3月31日
影迷心水
梁文道
「蘇古諾夫可說是當代唯一可與上一代俄羅斯電影大師塔可夫司基看齊的風格派導演，所以我會推介呢一部較為冷門的電影《日之丸》，讀歷史出身的蘇古諾夫十年間往返日本，重組裕仁的生活。就連日本人也拍不來的巨構。」
林二汶At17
「我最支持獨立電影，我推介《紀子之食桌》，內容好有Point，我鍾意睇要思考的戲，冷門電影都可以好好睇。」
李力持
「我就訂咗一套叫《愛斷背》的戲，故事都係講同性戀，故事好吸引，另類電影始終未喺香港普及，所以都理解有啲戲唔爆，唔係好出奇。」
Ruby
「我唔鍾意一啲血腥、暴力電影，所以《打雜詩人》應該會啱我睇多啲。」
華
「《板仔玩轉L.A.》好似幾好，唔係一套太沉重嘅戲，會睇得舒服啲，我好唔想睇一啲悲劇。」
