核心區寫字樓當炒，租戶最慘情，有啲公司索性搬去二三線商廈。一間租緊灣仔約2000呎寫字樓嘅工程公司，就睇中觀塘工辦物業摩登倉，承租高層近半層4598方呎，擴充業務，呎租只係九個半，租期3年。 中原九龍東工商部營業董事李彥樺話，呢個價平過個客𠵱家畀緊嘅租金，而且仲比物業嘅中層叫價十個半低，附近同類放租物業就要每呎十一至十一個半，睇落真係幾筍。