加息後個市買家大晒，敢放膽還價一定有着數。祥益盤嘉茵話，屯門嘉悅半島啱啱走咗兩件平貨，其中1座高層B室，668呎，原先放盤價170萬元，業主大幅減價16%，終於以142.5萬元賣出。另一件係銀主貨，位於同座低層D室，638呎，就減得輕微啲，只係由140萬元減到落135萬元，減幅3.6%。
另外，噚日蘭西寫過，沙田第一城有個炒家，賺幾萬銀就雞咁腳散水，今日整多單勁減價蝕入肉嘅成交過大家聽。中原助理區經陳世民畀料，45座低層E室，原業主97年以摸頂價191.3萬元買入，本來舊年初最高位時同類單位可以賣120幾萬，好衰唔衰個單位租約又未完，諗住今年初租約完咗，個市會好似班地產商話齋，爸爸聲咁繼續升，點知係沉底沉到媽媽聲先真，仲要一再加息，結果本來開價132萬元，一而再、再而三咁減價，卒之用102.5萬元脫手，累積減咗超過22%，唔見88.8萬元，數字就好意頭，之但係原業主就傷到入肉。