湖南有色（2626）首日掛牌，又見有人在市前交易時段將股價嘜高至7元，比招股價1.65元高3.24倍，可算認真誇張，肯定又要勞煩證監會查吓邊間證券行玩嘢。
不過，湖南有色首日表現實在唔差，高開70%，報2.80元，之後回至2.65元再慢慢升至3元才稍回，散戶有足夠時間在低位追貨，及在高位出貨獲利，水位高達13%，並唔係好似黑客所講，開市抽高就跟住掟貨，令到追貨嘅股民變輸家。
反而佢推薦嗰隻五礦資源（1208）就認真肉酸，上午最多升過3.3%，午後公布業績後，倒跌10.2%，收報2.65元。五礦全年賺1.82億元，跌17%，每股賺21仙，但冇息派，實在令人失望。
近日表現強勁的中移動（941）受唔住配股傳聞的壓力，被質低2.2%至40.75元收市。Cookie四圍索料，佢話除咗傳中移動本身想配股集資外，亦有傳聞話Vodafone減持，更有人傳光控（165）減持，幾乎傳到全部有貨嘅大戶都想減持咁滯。
金價創25年新高，紫金（2899）與靈寶（3330）股價造好唔出奇，但紫金近日升得特別勁，靈寶呢兩日每日升3-4%，但紫金卻每日升9-10%。據e莉莎報料，紫金可能會分拆銅礦業務上市。
紫金傳玩分拆
唔知江銅（358）又會否分拆個金礦上市呢？最近江銅接獲母公司要求，05年度派息比率最少50%，而一年內會獲母公司注資，種種行動似是想催谷股價表現。
不過，基金大戶賬面獲利甚豐，隨時會沽貨鎖定利潤，提防股價走勢與金屬價格逆走。
此外，由於油價及金價急升，好大因素是炒家看淡美元，若美息持續調升，油價與金價走勢確有機會突然逆轉。
阿虎