前晚邀群星行善的雷頌德在音樂創作的路途上曾多次涉嫌抄歌，近日他為側田製作的新碟《NoProtection》中，有兩首歌的編曲涉嫌抄襲，連他任美術總監的封面也有抄人之嫌。雷頌德沒有談及抄襲問題，只說：「有啲黑心，明知我今日開心日，特登校啱時間整到我唔開心，今日好彩做善事，唔係我生日，我做騷好開心，冇影響心情。」
雷頌德續說：「細節我唔講，我知自己做緊乜，鍾意首歌嘅人會知我有放heart。」提到有很多歌手撐他，雷頌德說：「friend嚟㗎嘛，有真理嘅。」
群星齊撐
眾歌手常呼籲大眾要支持知識產權，但不少歌手今次仍繼續撐雷頌德，許志安說：「音樂來來去去都得八個音符，好多大師級作歌都差唔多㗎啦，我覺得無可厚非。」何韻詩說：「有時作歌會聽其他歌攞靈感，好難判斷係咪抄。」問阿詩是否試過抄歌，她即緊張說：「唔會，係就成首攞啦。」至於Kelly則說：「創作好主觀，好似時裝咁，呢排興喱士，就全季都係喱士衫，或者呢排興呢隻編曲，咪似囉，Mark有幾百首歌，一、兩首歌似冇乜問題啫。」