黃耀明投資過百萬港元的「人山人海錄音室」昨日舉行開幕禮，何韻詩和楊千嬅前來撐場，阿詩表示日前率先使用錄音室錄音，笑言為它「破處」，千嬅則表示想做錄音室PR，與at17一齊𠱁老細拉客。
黃耀明、組合at17、何韻詩和楊千嬅等昨日到中環出席「人山人海錄音室」開幕記者會，明哥在會上表示這個面積過千呎的錄音室投資超過一百萬，他說：「遲啲會做埋廣告同電影配樂，仲會租畀其他歌手錄音。」
自嘲孤苦伶仃
阿詩自稱是錄音室的首名用家，她笑說：「我專長係幫人『破處』，我係講錄音室，好榮幸係第一個用家，呢度啲隔音設備比舊嗰邊好得多，舊嗰度出面落雨要停，有雀仔聲要等佢唱完先到我唱。」問阿詩送了甚麼賀禮？她說：「我已經係一份禮物，差未綁上絲帶，我將支私家咪放咗喺錄音室，淨係明哥先准借用。」
阿詩表示都渴望有機會組織類似人山人海的公司，她說：「可惜我收唔到人，人哋叫人山人海，我就叫孤苦伶仃。明哥係名牌，啲人爭住過去，我呼籲對音樂有理想嘅雙失青年嚟搵我，等我搵佢笨。」
撐側田冇抄襲
千嬅則表示希望明哥請她和at17一起做公關，她笑說：「等我同at17一齊去𠱁老細，招攬多啲人嚟錄音。」千嬅早前被拍到與人山人海成員于逸堯一起，對此她說：「錄音室可以畀我喪食、喪玩同喪唱，呢度又有才子男友，再咁傳落去，明哥就變成我老竇，V記（李端嫻）就係我阿媽，真係要明哥開間房畀我打工。」
對於側田的新歌涉嫌抄襲，千嬅力撐對方說：「佢有才華，唔使抄。」至於提到是否受到老翻王雷頌德影響，千嬅說：「音樂人聽埋咁多歌，諗嘢有少少相同唔出奇。」
採訪：李珮洳 攝影：陳慧安
