去年扮演醜女李笑好而人氣急升的湯盈盈，勇奪第十六屆壹電視大獎十大電視藝人之冠，在頒獎台上激動落淚。而亞視劇集《情陷夜中環》奪得十大電視節目第十名，葉璇成功攝位捧獎，還風騷致謝詞，當正是頒給她個人的獎項。
第十六屆壹電視大獎2006頒獎典禮昨日假尖沙嘴洲際酒店舉行，一眾得獎藝人悉心打扮。十大電視藝人中，湯盈盈以5103票壓倒第二名的宣萱及第三名黃宗澤，她從頒獎嘉賓郭富城手上取得獎座時，已經緊張得不知所措，致謝詞時忍不住激動落淚。而崔建邦及薛凱琪則分奪最有前途男女藝人（詳見附表）。
阿姐：勿搞小圈子
湯盈盈說：「好驚，我喺台下等攞獎已經好想喊，估唔到可以攞呢個獎。」第一次入圍便揮低不少電視台大姐，榮升十大電視藝人之首，湯盈盈說：「我唔覺得係打低其他對手，呢個唔係competition，入到十大我已經好開心。」
至於電視頒獎禮常客的汪明荃則奪得十大電視藝人第五位，她在台上警惕同業不要搞小圈子，她說：「今日可以見證老中青嘅演員喺埋一齊，我都係中，我好鍾意同新人合作，咁樣係好，所以千祈唔好搞小圈子，畀多啲人可以合作。」
亞視劇集《情陷夜中環》奪得十大電視節目第十名，亞視高層葉家寶帶同劇中演員葉璇、張文慈、林韋辰、梁敏儀上台。
張文慈木無表情
葉璇上台時即刻攝位，站到亞視高層旁邊，順勢接過獎座，張文慈則木無表情，到葉璇致謝詞時，竟變為她個人攞獎，逐個多謝其他演員，還第一個多謝張文慈。張文慈對此冷淡地說：「咁我多謝番佢，唔好再講呢件事啦！講咁多次。」
採訪：楊潔雯、胡比
攝影：葉君海
