又係公開大公司高層秘密嘅時間。新鮮出爐嘅打工皇帝，係舊年坐正嘅國泰航空行政總裁陳南祿。八方睇國泰年報，祿哥舊年𢭃咗九百二十九萬人工，拍得住金管局總裁任志剛。
雖然油價高企，令國泰舊年賺錢少咗四分一，祿哥依然有巨額花紅分，全年分咗三百四十一萬，多過前年4%之餘，亦相等於佢成份底薪；加埋其他津貼福利，全份糧仍稍有增加，加咗1.15%。
不過，祿哥𢭃呢九百二十九萬人工都真係唔易，佢呢位行政總裁成日要周圍飛去國泰嘅外站（全球辦事處）social，今日響英國，聽日飛去新加坡，搞到頭髮逐漸變白，個樣有時都謝謝哋。就噚日之嘛，祿哥又上咗廣州參加一個貿發局搞嘅論壇。無計啦，國泰要復飛上海，內地有免費宣傳機會，點可以放過呢。
傳真︰2623-9278
電郵︰[email protected]