中國稀土（769）一直盛傳話會獲大客戶美國通用入股，但入股都未成事，就在股票炒到㷫烚烚之時，失驚無神以每股1.38元批股，集資2.7億元，不過股價不但冇跌，而且炒得更高興。
經紀黃表示，佢一直都話家陣股市資金充裕，係基金求貨而唔係公司主動想配股抽水。據講中國稀土同美國通用單交易仍然傾緊，而配股反應聽講非常踴躍，好多芬佬都話分得少，所以配完股之後，股價不但冇跌，兼且有人一路買上。
中國稀土昨日最高見1.75元，收1.69元，升11.18％，成交股數有4953萬股，金額8275萬元。經紀黃又話，隻股升到呢啲水位，唔排除有人會食糊，預咗股價走勢好波動。
另外，唔知係咪大陸地產股隻隻都升晒，所以連較少人留意的新澤控股（095），亦因即將公布全年業績，股價突見異動，昨日升13.51％，收0.84元，成交股數3367萬股，金額2770萬元。
慕容小初