王建宙過檔中移動一年多，股價係咁上，王總自然開心，近排仲創出5年新高，升破40元水位。
原來集團一眾高層自己都好肥，佢哋去年行使嘅認股權證，大部份喺02及04年發行，行使價分別係22.75元及22.85元。其中，首席營運官魯向東同埋財務總監薛濤海，各自行使咗12.8萬股及22.8萬股，若果佢哋未賣，家陣都幾和味。
至於舊年加入嘅王建宙，去年獲發認股權60萬股，今年則有97萬股，行使價分別係26.75元及34.87元。雖然佢仲未行使，但按會計準則，以授權當日嘅公允價值計，呢批貨值約426.4萬元，有關收益已當成佢老人家舊年年薪嘅一部份，所以佢舊年酬金高達653.4萬元。若扣除呢筆，則年內酬金只得227萬，以一間年賺幾百億嘅公司嚟講，真係「抵到爛」。