話說早兩個禮拜，有肥龍之稱嘅政務司司長許仕仁講咗句，香港要乜乜物物，如果唔係就會被「邊緣化」。利世民有時非常佩服政客遣詞用字嘅能力，一個「邊緣化」就令到全香港人瞳孔擴張，然後個個都跟住佢口水尾，就連李超人都要響業績公布記者會上講兩嘴，你都咪話唔犀利！
雖然香港會唔會「邊緣化」？點樣「邊緣化」？幾時「邊緣化」？「邊緣化」之後香港會點？呢啲題目已經俾傳媒同評論講到爛晒，所以亦無謂再重彈呢啲舊論。利世民手上冇水晶球，亦唔敢話香港未來一定會走條點嘅路，不過講吓歷史都仲得，不如就講香港以前點面對「邊緣化」仲實際。
遠嘅唔講，七八十年代香港人以輕工業為榮。祖國一開放，乜工業都北移。當時有班死硬派古老石山，日日危言聳聽話香港冇工業實死，結果香港反而仲繁榮過以前，不過呢班友家陣仲耐唔耐走出嚟話要「工業、工業」。唔通佢哋真係嫌香港空氣污染唔夠差乎？
不過，呢班日講夜講邊緣化，其實背後就不斷要求政府呢樣嗰樣，好似啲乜乜物物訓練局。坦白講，當年香港大把，花少少錢嚟滿足呢班既得利益者冇乜所謂，之不過有一大班年輕人無辜辜被人吸引咗入行，結果經濟轉型下變成失業大軍，呢啲又係邊個嘅錯呢？
倒模訓練出來的創意
𠵱家又有一班人出嚟講乜嘢「創意工業」，真係希望佢哋放過啲後生仔啦！創意工業呢家嘢，講到明要創意，唔係要你哋啲以工廠方式訓練出嚟嘅技師。究竟你哋班人知唔知道，響「知識型經濟」入面，差唔多間間公司都有自己一套技術同文化，你哋用「倒模」方法訓練出嚟嘅技師又有乜增值呢？再講，董痛腳講嘅嘢都信到十足十，利世民對呢班既得利益者真係……唉！
呢個世界只有脫離現實嘅人會以為佢哋可以阻住地球轉，利世民想點醒佢哋，每個地方每個社會，日日都喺度「邊緣化」，只不過用正面嘅眼光睇，呢啲係進步嘅動力，最緊要一點係，唔好吓吓郁啲就要政府搞乜乜物物工業，到頭嚟啲人入咗行又冇嘢做，責任又喺邊個度呢？
利世民