煲呔噚日去立法會答問大會，雖然冇乜同議員舌戰，但都唔少得要暗地裏寸吓人咁。
好似公民黨黨魁余大狀問佢政府總部有乜慳電大計，煲呔就無情情話立法會都要慳㗎，仲要同立法會比賽，睇吓明年邊度慳得多啲，擺明暗踩立法會都唔係好慳到電啫，所以余大狀對煲呔嘅挑戰好勞氣，話明明政府係大花筒，同我哋比賽咪好唔公平？
你話政府係大花筒，踩佢踩到上心口，又點會唔還拖？煲呔跟住就一輪嘴數話，政府總部有三千人，立法會得三百人，以人頭計用電量，就知邊個係大花筒啦，一於為佢嘅曾氏帝國進行大平反。
講慳電講到勞勞嘈，一講食嘢就心情暢快晒。講緊活雞供應量時，煲呔就話同飲食界Tommy張一樣都咁緊張，而且同樣好愛食白切雞，亦都可以一口分辨出邊啲係冰鮮雞同活雞，講到自己好似食雞專家咁。佢仲話新加坡用冰鮮雞整海南雞飯，都令咁多人慕名捧場，香港都一定得。
最新消息，國家副主席曾慶紅鐵定四月二十一至二十三日間出席海南省博鰲論壇，由於煲呔都會出席，睇嚟好有機會出現「雙曾會」。
傳真︰2623-9278
電郵︰[email protected]