集金融、貿易、展銷等服務於一地嘅北京CBD（中央商務區），噚日喺香港搞金融產業總裁研討會，家吓紅旗當道，唔少本地金融機構高層都畀面出席，包括馬時亨、王冬勝、艾爾敦、孔令成同陳德霖等。
呢個會亦成為新知舊雨聚頭場合。滙豐香港執董王冬勝，同埋調去北京做分行行長嘅丁國良（圖一左），加埋舊年先至退休嘅前大班艾爾敦（圖一右），大家見面即雞啄唔斷，尤其丁國良見到舊上司鬼咁開心，原來家陣喺羅兵咸永道做顧問嘅前大班，間唔中都會北上公幹，有時間就會搵丁國良敍舊。老外去到北京，搵個識途老馬帶路去食好嘢都好嘛。
另外，王冬勝被問到加息問題，佢話假如同業拆息大幅上升，佢哋先會加息，如果唔係就冇必要加喇。佢又提多次話，５月應該會再加息一次，之後因為數據參差，難估啲喎。