3月31日
心情：受驚
近排電腦男想換DC，睇中SONY部高階機R1，連出名奄尖要求多嘅攝影師麥士李都大讚，話佢色彩表現真係好好，畫質亦可媲美單鏡DC！最啱佢老人家心水嘅，係反應夠快，由對焦到㩒Shutter、再儲存，都充滿大機嘅爽快感，當佢菲林機咁「喪啤」都仲得！
聽佢咁讚法，電腦男嗱嗱臨落旺角電器街親身試機啦，玩咗一輪，的確幾啱心水，跟手諗住豪氣啲，不如買埋Tele鏡同WideAngle，方便出Trip用嘛。點知Sales話冇鏡頭配喎，咁惟有唔買住，再四圍睇吓邊度有鏡賣啦。卒之走勻全旺角都唔多見影，買機癮又起，衝動起上嚟居然殺落尖嘴港運城嘅SONYShop度買。唔睇猶自可，一睇把幾火；一支Tele、一支Wide鏡，各自叫價三千，必配Adaptor亦要$580，全套加埋要六千幾先落到樓！ 咁咪好囉，索性慳番唔使煩。
自從SONY宣布收購KonicaMinolta相機業務後，銳意打破潮人機嘅形象，開始企圖另建專業味，不過貴唔一定代表Pro㗎，只會畀人有搶錢感覺。