世姪Y五年前考大學，曾徵詢左丁山意見：「讀邊科最易搵工？」左丁山知道佢係理科高材生，讀科學、電子工程本來唔錯吖，但二○○一年之時，科網股已經爆破，世姪Y認為讀理工科冇前途，要入大學讀商學院，於是左丁山叫佢讀會計，畢業後包有工做。世姪Y後來果然入咗科技大學讀會計。
事隔五年，幾乎唔記得咗件事，上星期有人話，世姪Y考咗入警隊做見習督察，已經入咗警察學院，左丁山為之錯愕，現在會計人員咁吃香，有工冇人做，點解轉行做警察幫辦呀，嘥機會啲噃。搵人找世姪Y一問，佢大吐苦水，原來佢畢業後立即畀Big4招攬，做核數師，頻頻上大陸，兩年來每個工作日係做7-11，做到有氣冇碇唞。成班同年紀同事每日在大陸客戶辦公室見面，或返嚟香港在會計師樓辦公室碰頭，完全冇嘢講，大家只係做做做，相對無言。
世姪Y話：「Iwantmylifeback！喺四大會計師樓打工，想做合夥人，我啲師兄話一千個之中都怕有一個嘅，要捱多十年，人生如此有何意義？於是轉投警隊，起碼第二日有假放、有退休金吖嘛！」
世姪Y如此想法，好難話佢唔啱。假如佢未轉工前問左丁山意見，就會勸佢考咗會計師牌，成為CPA先至講。另一位世姪女在P記又係做得好辛苦，一考完牌，有咗資格之後就轉咗工，到跨國公司做「內部稽核」（internalaudit），現在全世界周圍飛，三個禮拜喺印度，兩個星期喺阿姆斯特丹，跟住一個星期在首爾，雖然飛得辛苦，佢話好過去大陸偏遠城市踎一頭半個月嚟核數。
不過咁，人各有志，世姪Y話唔定三十年後會成為警務處長呢。各位仍在大學攻讀會計學或者正在報讀會計系嘅同學，不妨花啲時間仔細諗清楚自己嘅真正興趣。