太古地產喺金鐘太古廣場1座5樓有個會議中心，好多時啲記招都係喺呢度舉行，蘭西去過唔少次，呢個會議中心啱啱完成翻新工程，重新開放。
可能好多人對呢個會議中心都好陌生，等蘭西介紹一吓啦。成個會議中心可出租面積約萬五呎，間咗14間房，面積575至3002方呎，分劇院、教室、會議及U形會議式座位編排，每間房可以座18至最多252人，實行要將市場用家一網打盡咁款。
至於收費，上下晝都係3300蚊起，夜晚就貴啲最少3800蚊；假如租足一日就4400蚊起，最貴係做展覽，一日最少收6.8萬。太古話可應客戶要求，提供埋餐飲同即時傳譯服務。
雖然呢個中心，每年嘅租金收入，相對太古集團嚟講濕濕碎，但係小數怕長計，既然呢類用途市場需求大，租金收入計落又高過淨係做寫字樓好多，所以太古都肯花錢翻新個場，以迎合市場要求；同時，提供呢類服務之餘，又可以對隔籬嘅酒店同商場有帶動作用，實行「肥水不流別人田」。大公司都咁精打細算，最開心嘅應該係佢嘅股東。
電郵地址：[email protected]
