香港人災難意識可謂冇乜！從好處看係近年並冇遇過大型天災（人禍倒唔少），唔好話龍捲風、地震，就連颱風都運路走！PS2新出嘅《絕體絕命都市2：凍結的記憶們》或者可以喚起大家災難意識；水淹地下城、洪水步步進逼，感覺已極富災難臨場感，更強是加入體溫同濕身系統，太凍、太餓、俾水淋到喪失體溫，都可叫你行行吓暴斃，真係比大家睇報紙、電影更富真實感！
記者：朱崇德
《絕》系列一向以災難現場真實感做賣點，前作以地震為主題，日本人勁貼身固然熱賣，香港人亦是識貨Gamer，所以去貨亦見凌厲；《絕2》今次玩大洪水逃生記，好多人以為佢係炒作南亞海嘯事件，但事實正好相反，其實遊戲早已籌劃得七七八八，點知撞正該次事件，為免引起部份人的傷痛回憶，所以推慢出Game時間，都可算相當有良心！
創新體溫濕身計
故事背景發生在2010年日本富坂市，話說該處興建了一座舉世矚目的地下城市，正當隆冬聖誕節開幕之際，碰巧撞上百年一遇的豪雨，令水壩決堤水淹整個地下城，洪水從四面八方洶湧淹入，玩家就是要飾演城中一個又一個的小人物，經歷一段走難史；遊戲以多線發展，分別為主角篠原，及女逃犯佐伯、的士司機柘植及學生西崎，佢哋喺城市中不同角落、遇到不同的恐怖經歷，不過唯一的共通點，是四周又濕又凍；新設的體溫及濕身計，就是普通周圍閒逛都會令體溫逐漸下降，引發低溫症而死，更大的挑戰是角色經常要澗水及被洪水照頭淋，後果係短時間令你凍僵兼暴斃，遊戲系統勁創新之餘，又能令你體驗冷、水結合的可怕，兼且玩落仲一步一驚心！
極地求生教育指南
遊戲基本以動作解謎進行，考起玩家之處是遊戲以多線角色發展，但場景內破關道具相當有限，正是A角色用咗時、B去番同一個位就冇得用，點樣在這些重要位預留道具，真係相當考智慧！為令遊戲更有血肉感覺，好多位都要靠NPC幫手破關，筆者曾試過在一個關位卡住，後來發現使用「呼叫」功能，幾十呎外的電腦角色竟然走過嚟開門救我一命，正是體現了危難中守望相助的精神，而且遊戲中還有很多求生手冊式的情節，例如甚麼裝束最保暖預防低溫症、危急環境要先讓老弱婦孺等，都好有教育意味。
PROFILE
遊戲類型：AVG
對應機種：PS2
遊玩人數：1人
開發商：IREM
售價：$378
評語：
遊戲聲畫表現較一般，不過求生手冊式內容，夠真實之餘又有教育意義，幾有心思；最抵讚係佢唔玩《TombRaider》式操縱技巧大考驗，改以危急情況下，考玩家在有限時間內腦筋急轉彎（否則會凍死），何所當為、何所不應為，真係令更多Gamer可享受遊戲的樂趣！
