小記好鍾意睇鍾澍佳導演嘅戲，尤其係之前無綫嘅重播劇集《難兄難弟》，晚晚食住消夜追，知道鍾導演呢排喺大陸啱啱拍完電視劇《天橋的童話》，仲同埋女主角兼製片人柯穎（Kelly）返嚟香港，即時問吓佢哋大陸有咩好嘢食。原來佢哋對上海菜頗有心得，更加覺得香港嘅上海菜比上海更好食。唔係啩？！
記者：葉靜君
攝影：楊錦文、陳偉強
香港上海菜 無咁油膩
鍾導演同Kelly同樣對食十分挑剔，無論喺北京、昆明、上海或巴黎合作嘅時候，除咗工作之外，其餘時間都係講飲講食。Kelly係上海人，佢哋喺上海合作嗰陣，Kelly成日帶導演食上海新吉士好出名嘅醉蟹同紅燒肉，而身為東道主的鍾導演就話：「佢𠵱家過到嚟香港，梗係要帶佢去食番香港嘅上海菜啦！」兩個為食鬼試過啲菜都話香港呢邊比上海嘅無咁油膩，啱晒香港人嘅口味。
紅棗糯米$40
Kelly：「紅棗入面釀咗糯米餡，入口十分煙韌彈牙，出面層糖漿因為係最後兜上去，所以包得好均勻，唔太甜，味道啱啱好，𠵱家春天食至啱。」
清炒河蝦仁$120
鍾導演：「蝦質清爽彈牙，每日都由江蘇嘅高郵湖運嚟，唔怪得咁新鮮啦！聽我講！食呢種蝦應該舀一大匙，然後滿滿咁放入口，令成個口腔都感受到蝦嘅爽同鮮味。」
葱烤雅片魚頭$300
鍾導演：「用咗比目魚嘅深海大魚頭，好特別。烤焗可以令魚乾爽，無咗平時蒸魚嘅油同埋水。肉質食落去好似蟹，但比蟹多咗一種香，嗰種係葱焗嘅香味。最重要係大大件，簡直可以當魚扒咁食。」
香港VS上海
論醉蟹
話梅醉膏蟹$250
Kelly：「蟹吸收咗酒，味道好香，唔太濃又唔太淡，膏肉好鮮甜，軟硬均勻，夾雜話梅嘅酸甜，好開胃。」
上海新吉士嘅芙蓉蟹膏$168
膏雖然很受歡迎，但卻比香港的油膩，導演始終係香港人，而Kelly係女仔，太油膩唔啱佢哋！
講裝修
香港店：中式圖案西式地板
香港店的大門外有幾幅中國的圖畫及毛澤東詩詞，中式牆身圖案加上西式地板與照燈，中西合璧夠晒時尚！
上海店：住宅式拱門設計
無論大門口跟室內都有種中國古建築的感覺，門口是住宅式拱門的設計，加上老宅式的窗頁，傳統風味十足。
美食當前 思潮停滯
大家都對電視製作及藝術有一份熱誠，問到佢哋平時靈感何來？Kelly就話坐喺舒服嘅哋方，食到好味嘅食物，靈感就會突然湧現；但鍾導演就剛好相反，要喺飢寒交迫的情況下，靈感先至可以逼出來。咦！咁𠵱家美食當前，唔知佢哋啲靈感會唔會突然來臨，又突然飄走呢！
食客幾句
張小姐：佢哋啲上海菜好正宗，好似返番上海食咁，我最鍾意話梅醉膏蟹，正！
Niki：呢度環境好寬敞，好舒服，一邊同朋友食嘢，一邊歎正宗嘅上海菜，唔錯！唔錯！
新吉士上海菜（28901122）
地址：銅鑼灣恩平道28號利園2期2樓201-203舖
營業時間：12:00nn-11:00pm
座位：180個