由於商廈供應緊張，加上需求大增，市道形勢一片大好，投資者同用家紛紛入市，核心區嘅盤搶到飛起，次級地區嘅都受惠，連好日都冇買賣嘅商廈，都一樣錄得成交。
尖沙嘴漆咸道南嘅其士大廈，12樓6室面積1361方呎單位，有實業家以759萬買入，呎價5577蚊，係大廈半年嚟第一單買賣，喺商廈市道火熱嘅情況下，係咪令人難以置信呢？查實成交少皆因放盤唔多，尤其係交吉嘅。
上述買賣係其士大廈唯一交吉盤源，買家傾咗一個禮拜就拍板，諗住自用。
中原地產九龍商業部營業董事麥偉嫦話，其士大廈因實用率高，有78%，同區都係六成幾到七成實用，附近又多食肆，所以業主都比較進取，大部份都要六千蚊呎過外，高隔籬左近成一千蚊。
講開非核心區商廈，中原香港商業部營業董事何紹榮報料，北角嘉華國際中心低層八室，860呎，啱啱以344萬轉手，圍起每呎4000蚊，係近兩年新高。呢個價錢拍得住北角地鐵站上蓋嘅港運大廈每呎5000蚊。
非核心區商廈造價都開始炒上，睇嚟客戶捱貴租嘅日子好快來臨。