名模周汶錡及吳嘉龍日前在紅磡為一比賽任評判，更學足大熱美國真人騷《America'sNextTopModel》情節，即時out走參賽者，周汶錡耐心地教各人行騷心得，反之吳嘉龍則做惡死評判，更直斥眾男模：「完全唔掂！」
名模周汶錡與吳嘉龍早前為瑪花纖體、Men'sSkinCentres舉辦的「全港變身萬人迷大賽」任評判，在五男五女的參賽者中，即場叮走兩名出局，抄足大熱美國真人騷《America'sNextTopModel》橋段。
大授貓步心得
周汶錡說：「我有喺電視睇過呢個真人騷，好慘㗎！啲評判鬧到啲女仔死，好惡死，我唔會咁衰！」在今次比賽中，參選者要做模特兒行catwalk，周汶錡一路細心觀看女參賽者行騷之餘，亦即席大授貓步心得，不停指點參賽者：「唔好寒背！」「行catwalk時腳步放輕啲！」又示意眾女model記得叉腰騷香肩等。
相反男評判吳嘉龍就用半鹹淡廣東話，非常刻薄眾男模，不停口話：「你哋錯晒！咁樣好核突。」更直言：「完全唔掂！」吳嘉龍說：「我揀啲人要outgoing啲，要有信心，眼神要好出！」
不停打情罵俏
而周汶錡與吳嘉龍這一對舊緋聞男女，不知是否近日各自有新歡，在評審期間，兩人玩得特別放肆，吳嘉龍一度攬住周汶錡，周汶錡即時用手指叉住他的臉龐作回敬，問周汶錡對吳嘉龍有緋聞女友賴浣貞，可有甩難感覺？她說：「冇喎，我不嬲冇在意呢啲，我同佢都係煲水嘢，不過佢個人幾好，好玩得！」
採訪：林妙萍 攝影：林德雄
