期指結算日，個市得得哋，恒指進賬135點，繼續由中移動（941）領漲。恒指升幅，有71點由中移動貢獻，其次中海油（883）亦貢獻12點。
中移動創新高，由3個禮拜前低位起計，升幅16%，短線超買，高追C輪要先諗吓風險嗰便。中海油近日派成績表後由6.45元碌落嚟，有機會反彈，C輪不妨揀一兩隻短炒。
中海油C輪2251：7月前到期而溢價喺10%以上嘅中海油C輪，雖然槓桿率大啲，但唔值得博，要諗嘅係壽命較長嗰啲，例如2251。隻輪10月初夠鐘，輪價62仙，溢價8.3%，槓桿率9.7倍（有效5.7倍），引伸波幅32.8%。另1隻熱門C輪2159亦唔錯，隻輪7月初到期，輪價39仙，溢價6.5%，槓桿率15.4倍（有效8.3倍），引伸波幅31.1%。
中銀C輪9068：中銀（2388）最高15.75元，收15.65元，有10仙進賬。中銀盤數正，股價未作相應反應，遲早跑番快啲，有平C輪不妨買定先。
中銀C輪9068數據唔錯，6月尾夠鐘，輪價66仙，負溢價0.7%，槓桿率23.7倍（有效15.7倍），引伸波幅14.4%。遠期輪，則揀4759。隻輪12月中到期，輪價0.78元，溢價6.5%，槓桿率20.1倍（有效8.8倍）引伸波幅20.9倍。
章盛