大市跌1日，又再升過，低位愈來愈高，恒指升135點，成交上番323億元。結算後會點？人人都睇住16000呢個大關口，衝唔衝得破，好快會揭曉。
今個月中，推介德泰中華投資（2324），話佢好快就會發出金光，果然牛皮咗一輪後，噚日突然有大動作，搶上0.97元後回收0.94元，大升17.5%，成交有2800萬股，幾乎係發行股數的30%，咁大Lot貨轉咗手，市面嘅貨源好明顯係落晒強者手中，今後可望空衝刺。噚日有一手成10球貨，聽聞係一家美資大行接咗，遲啲會有公布。
中新集團（563）連升幾日，噚日曾低成1.01元，但掃上1.08元高收，升2仙，當佢調整完成，下一目標1.25元。中新又係3月中推介過，當時股價0.92元，收到嘅料係大股東在內地有廣泛嘅人脈關係，手上擁有好多靚地，日後會陸續注資。
成交大增動力足
蘋果去年失收，今年會恢復正常，果汁生產業低潮已過，安德利果汁（8259）股價亦開始由低位回升，噚日收0.73元，升6仙，升幅8.9%，成交更大增到2500多萬股，係16個月以來高紀錄。
安德利上月中由0.82元反覆回落，到近日宣布業績後即由低位回升，現時已升破下降軌，並重上10日、20日同50日線，MACD亦會出現雙牛入貨訊號，升浪確認，短期上升目標指向0.92元。
集團因蘋果失收，05年度（12月年結）盈利7592萬元，倒退17.1%，公司已採取多項相應措施，減輕蘋果短缺影響。今年蘋果產量預期會恢復正常，加上公司再增設生產線，年銷量將由10萬噸增至15萬噸，而毛利較高的果膠產品，今年下半年亦可投產，估計06年盈利可由低位大幅回升至1.2億元，增58%；07年果膠提供全年貢獻，盈利可再增至1.5億元。為應付市場需求，集團在陝西省咸陽市及遼寧省大連市新建一條生產線，使年產能力由現時的15萬噸提升到21萬噸，同時並會透過兼併收購，使產能再上升至25萬噸。
安德利係基金股，已公布的基金持股量達30%，公司已安排轉主板，基金會更安心持有，甚或加碼。
郭兆誠