唐唐日前喺立法會回應預算案嘅演詞，批班民主派之餘又不失斯文，將壓抑咗一個禮拜嘅寃屈爆晒出嚟，怪唔得佢噚日喺立法會答問大會上又重現笑容。
原來呢篇咁切合唐唐心意嘅演詞，都係由預算案寫手，即係財經事務及庫務局首席助理秘書長李百全操刀，可能同財爺合作過，所以今次完全能夠寫出唐唐心聲。
可惜呢個好幫手，下個星期四正式調任至特首辦做副私人秘書，老闆旋即變成強人煲呔。講開原來庫務局副秘書長謝曼怡，亦早已喺預算案完咗之後調去做行政署署長，庫務局一時間咁多人走，局長馬仔亨真係要搞個farewellparty至真。
講開party，八方聽聞，喺上年庫務局嘅聖誕聯歡會中，馬仔亨玩得好投入，仲臨時將抽獎禮物加碼，喺身上唔知邊度，忽然攞出兩張各值五千大元嘅旅遊禮券，同事見到梗係We嘩鬼叫，由此可見馬仔亨好疏爽，同時亦好識𠱁下屬，一定唔係無良僱主。
傳真︰2623-9278
電郵︰[email protected]