沙田第一城係指標樓盤之一，升好跌好，都會行先人一步，再加上盤源多、交投量大，係新界區大型屋苑中嘅炒家天堂，由於物業有唔少三百零呎細單位，樓價100萬元上下有交易，過去幾年成為唔少初哥炒家嘅試練場。
但係過去幾個月，樓市一直浮浮沉沉，一啲初試啼聲又把握唔到甩貨時機嘅業餘炒家，微賺微蝕之聲此起彼落。美聯區域經理鍾燕河話，剛啱有宗8座低層395呎單位易手個案，賣方舊年11月用94萬元買入，其實都算平價，𠵱家同類單位市價都去到110萬元左右，之但係個業主唔睇好加息後市況，結果雞咁腳收100萬賣咗層樓，賺6萬，扣除兩萬幾使費，當中咗六合彩三獎啦。
鍾區經補充，今個月一城有55宗成交，同上個月差唔多。