孫柏文一連幾日都講白銀，大家都知道我係白銀大好友，而且隻金手指邀功都邀到手指軟，所以，今日想講番啲比較宏觀啲嘅嘢。順便同大家上一堂通識教育課。通識教育係乜？總括嚟講，就係冇modelanswer嘅學術研究，甚至係冇答案，研究完得出嚟嘅結果係仲多啲問題。
今日想講嘅係花旗國種族關係。孫柏文有幸喺花旗國讀大學，仲要係大學被人告到去最高法院，話我母校種族歧視嘅時候就讀。嗰陣時，真係覺得喺種族問題上，黑人同白人冇偈傾。點知𠵱家，真係有樣種族問題，花旗國黑人同白人都普遍反對。佢哋反對乜？就係墨西哥非法移民囉。
根據估計，花旗國𠵱家有大約1100萬個墨西哥非法移民。花旗國人民話佢哋搶飯碗，同埋用晒納稅人嘅資源。咁今日通識堂，想研究嘅第一個角度就係，如果花旗國將墨西哥嚟嘅黑工全部趕走，會對伯南克主宰嘅貨幣政策點樣？嗱，墨西哥來嘅黑工大約佔花旗國勞動人口嘅4.9%，而花旗國失業率只係4.7%，咁如果花旗國政府真係趕走晒黑工，花旗國生產出來嘅商品同服務嘅價格，就自然會升。首先，嚴重影響花旗國商品同服務嘅競爭力，出口減少，令貿易赤字惡化，美元受壓。再講，如果花旗國商品同服務價格上升，亦都等如通脹率惡化，到時你話伯南克會點做？如果加息，咁香港會點樣？一條花旗國對黑工嘅法例，足以震散全球經濟。
不同民主制度 不同聲音
再用第二個角度研究，花旗國人民普遍反對被黑工融入花旗國社會嘅機會。不過，𠵱家喺花旗國參議院，有一條被黑工融入社會嘅法例，得到過半數議員支持。有人話，咁樣係啱嘅，議員係應該有道義責任做自己覺得啱嘅嘢，選民唔likey可以下次唔投票選佢。又有人話，咁樣係唔啱嘅，議員係應該有道義責任好「貼市」咁代表選民聲音。呢兩種想法，就係麥廸遜式民主制度，同埋傑弗遜式民主制度嘅分別。喺香港，直選議員都好啲，功能組別議員就日日為呢樣嘢掙扎。唔信？你問吓會計界嘅譚議員。
因為篇幅有限，金手指就篤住咁多先，都知道大家學到好多嘢。所以大家唔好話通識教育冇料到。
孫柏文