噚晚紅館舉行雷頌德公益金音樂會，嚟咗兩位稀客──沙士孤雛郭名慧同佢快三歲大嘅小弟弟翔星。
香港人都好難忘沙士○三年春天肆虐，更難忘郭善雄一家，當年喺溫家寶懷中抱住嘅小嬰孩，下周就滿三歲，你話時間係咪過得好快呢？
小翔星好精靈，眾人媽打李麗娟噚晚抱住佢去紅館睇show，仲畀記者影相，佢一啲都唔驚。李麗娟話，今次係小翔星第一次去睇音樂會，佢哋聽咗個幾鐘先走，小翔星唔知幾投入，仲喺度揮動螢光棒，𠱁得大家好開心。問下次嚟唔嚟，佢仲曉講嚟，真係好cutie。
眾人媽打噚日同佢妹妹李桂蘭一齊陪郭家去聽音樂會，入場前佢哋去咗都會海逸酒店食飯，仲專登買咗個蛋糕提早為小翔星慶祝生日，吹蠟燭。小翔星契媽李麗娟一講起個契仔就笑，話佢好多嘢講，今年八月就讀K1，至於家姐就讀緊三年級。
郭善雄係九巴司機，契媽話佢好想有新生活，所以已經搬離淘大花園，之後希望可以平靜咁養育一對仔女，香港人見到郭家小朋友咁活潑可愛，都應該感到放心喇。
傳真︰2623-9278
電郵︰[email protected]