日本萬事得車廠在當地推出了新一代MPV，我跟新車接觸後，發覺它外表和操控表現也變得更Sporty，飛機商務客艙的中排座椅也成為了新車的最大賣點。不過，最特別還是「電動復原後排」，搬完行李，只要輕輕按鍵，收得密實的後排便會自動彈出。
記者、攝影：鄭達基
上兩代的萬事得MPV，部車個樣斯文大方之餘，Size仲要有咁大得咁大，但已改名為Mazda8的新一代MPV，車體多個地方都變得Sporty，例如換咗一對面積較大的頭燈，襯埋同樣變大了的鬼面罩，加埋尾翼和經過重新設計的尾燈，個樣Sporty到你唔信。不過，原來最大的改動是車高，新車足足比上一代調低了60mm，令整部車看起上來酷似高性能跑車之外，離地距亦只有155mm，加上開啟幅度達785mm的雙趟門，乘客上落無難度！
中排真係好舒服
Mazda8最吸引我的地方是中排的SuperRelaxSeats，用作測試的新車只是傳統的絲絨，但感覺比真皮還要好；再者，可左右獨立移動的中排SuperRelaxSeats，能隨時變作三人座椅，還特別設有腿墊和可作角度調校的頭枕，若果將椅背向後放低些，舒適度跟飛機商務客艙的座椅毫無分別。我試過在車程中由司機變身做乘客，配合埋軟硬適中的避震Setting，不論經過一些凹凸不平的路面，抑或是高速走彎，我仍可安坐於座椅上，不消數分鐘便可睡得大扯鼻鼾，到底有幾舒服，唔使我多講喇！
設備唔使講就梗係電控雙趟門、冷氣等，但係最正斗都係一按式調校後排椅背設計，覆摺放平後想變回原狀，只要輕輕拉一拉旁邊的控制鍵，便會自己搞掂，至於3D立體投射錶板，資料齊全唔在講，最好還是夠搶眼嘛！
2.3公升偈夠用
在日本發售的全新Mazda8，廠方安排了兩台分別是自然吸氣和附有Turbo裝置的2.3公升MZR引擎供用家選擇，前者馬力是163匹，後者則為245匹，足足多出了82匹，這個絕對是高性能跑車應有的動力輸出數值；之不過，我們在當地測試的新車和抵港發售的版本，就只配上沒有Turbo裝置的引擎。聽完我咁講之後覺得好失望？咁又唔使，事關我們在當地測試了一整天，甚麼路段也試過了，不論高速公路還是郊區的上山落山大斜路，載着四人兼開盡冷氣，引擎並沒有向我提出半點抗議，縱使我大腳踏下油門，它仍默默耕耘地輸出應有的動力，全無偷懶。
廠方只為Mazda8安排一套4前速+/-半自動波，因為早前測試過換了5前速+/-半自動波的Mazda62.0，反應比4前速版本敏捷和順滑，為何廠方仍只為新車配上4前速版本呢？據ProgramManager青山裕大解釋，Mazda8是一款供多人乘坐的車種，並不是每每要超過100km/h，若用作日常代步的話，4前速波箱已經夠用。我覺得這個答案有點牽強，為何Mazda8呢類MPV不能配用5前速波箱，而其他品牌的MPV車款或自家的四門房車就可以？真的令人大惑不解。
日本台場我最愛麵包超人
今趟日本之行，食得好住得好，仲可以好似玩《GT4》咁，在公路上暴走。去到台場，一定要去「船 科學館」參觀，又要搭由膠輪胎作車輪的「新交通」列車，仲有日本電視台總部，旁邊的麫包超人紀念品專門店，睇到我流晒口水，最後必去係AQUACITY商場Shopping。
新車好與壞
加速：B
我覺得加多個Turbo或用3.0公升Engine會更好。
轉向：A
經改良的車架，令車子過彎時比舊版定得多，睇位Easy。
制動：A
表現出色，點解我會知？因為我試過急煞囉！
傳動：C
4前速+/-好順，不過5前速會開心啲。
舒適：A
中排舒服到呢……
耗油量：B
在香港我諗大約是$1.3至$1.6。
車廂噪音：A
Mazda8的隔音比上一代明顯好咗好多，靜到有耳鳴感覺。
評分標準：我們根據記者試車後的感覺給予評分，最好為A，最差為E。
萬事得Mazda8規格
引擎：2260cc直4DOHC
馬力：163ps/6500rpm
扭力：21.4kgm/4000rpm
傳動：4前速+/-半自動波
售價：待定
查詢：萬事得汽車（28931112）