由喺本地做賓卡到北上長駐內地，出掌滙豐中國業務總裁一職，再調任中國第五大銀行交通銀行副行長，葉廸奇過去三年多的發展經歷，可算係本地銀行界嘅表表者，而滙豐入股交行後，「出雞又出豉油」嘅真情合作模式，肯定可以成為外資行入股內地銀行嘅典範。
久未在港公開露面嘅Dicky（葉之洋名）表示，過去幾年喺國內工作嘅經驗非常寶貴，調任交行後，更有機會對中國金融業發展及商業銀行嘅改造工程，貢獻「綿力」，感到難能可貴同光榮，不過對於自己嘅「刨冬瓜」水平，佢謙稱只得60分，較從滙豐調任交行時只高咗10分。
領有飛機駕駛執照嘅葉廸奇，長期參與政府飛行服務隊工作，千禧年嗰陣更喺特區政府度攞到銅紫荊星章，佢話長駐上海唯一要犧牲嘅，就係冇得揸飛機，但大上海生活質素同香港無異，公餘時間打高球聽音樂一樣方便。