立法會前日雖然係通過咗《公眾衞生（動物及禽鳥）（禽畜飼養的發牌）規例》，但原來衞福局呢鋪贏得好險。事關睇番投票紀錄，當時只得接近三十個議員在場，如果有議員玩嘢，要求點人頭，睇吓在場夠唔夠半數議員，都好有機會流會收場。
當時在席嘅鄉議局話事人發叔都同八方講，政府唔肯就散養家禽賠償畀新界人，咁又點可以啃得落呢條法例呢？橫掂佢哋反對，都有諗過㩒唔㩒鐘好，等政府衰一鋪都好，但最終……都係決定畀多次機會政府喎。
不過，當然唔可以咁順攤就算，所以佢拉埋副主席張學明離場以示不滿。發叔今次都算賣咗個人情畀政府，雖然唔知政府領唔領情，多啲重視番新界人權益，但發叔講明，如果下個月二十二號村代表大會舉行前，政府都無任何善意回應，佢真係擔保唔到鄉民有乜反擊行動喇。
傳真︰2623-9278
電郵︰[email protected]